झापा । भद्रपुरस्थित भूमिसुधार तथा मालपोत कार्यालय झापाले अनधिकृत व्यक्ति (बिचौलिया) प्रवेश कडाइ गरेसँगै सेवा प्रवाहलाई व्यवस्थित,छरितो र पारदर्शी बनाउन टोकन प्रणाली लागू गर्ने भएको छ। 

वर्तमान अवस्थामा सेवाग्राहीलाई सेवा प्रवाहमा समस्या साथै घण्टौं पर्खिनु पर्ने कुरालाई लक्षित गर्दै मालपोत कार्यालयले बिहीबार सूचना जारी गरी वैशाख ७ गतेदेखि टोकन प्रणाली लागू गर्ने निर्णय गरेको जनाएको छ। 

सूचनामा भनिएको छ,जनशक्ति,क्षमता र संरचनाको आधारमा दैनिक सेवा व्यवस्थापन गर्न ६ वटा मोठ फाँटबाट प्रति मोठ २५ वटा टोकन वितरण गरिनेछ जसअनुसार दैनिक करिब १५० वटा लिखत पारित तथा निर्णयसम्बन्धी कार्य टोकन प्रणालीमार्फत सञ्चालन गरिनेछ। 

टोकन बिहान ९ बजे दर्ता चलानी र नागरिक सहायता कक्षबाट वितरण गरिने कार्यालयले जनाएको छ। सेवा लिन आउने सेवाग्राहीले सम्बन्धित कागजातसहित स्वयं उपस्थित हुनु पर्ने सूचनामा उल्लेख गरिएको छ । कार्यालयले सेवा प्रवाहको क्षमता विस्तारसँगै आगामी दिनमा टोकन सङ्ख्या पनि बढाउँदै लैजाने पनि जनाएको छ।

टोकन प्रणालीमार्फत उपलब्ध सेवाहरूमा लिखत पारित,संशोधन, नामसारी, दाखिला खारेज, प्रतिलिपि, रोक्का र अद्यावधिक रहेका छन् । त्यस्तै टोकन आवश्यक नपर्ने सेवाहरूमा फुकुवा, वर्गीकरण, स्रेस्ता उतार, हालसाबिक र भूमिसुधार फाँटसँग सम्बन्धित कार्यहरू रहने कार्यालयले जनाएको छ । त्यस्तै मालपोत कार्यालयले  भूमि व्यवस्था, सहकारी तथा गरिबी निवारण मन्त्रालय अन्तर्गत भूमि व्यवस्थापन तथा अभिलेख विभागको निर्देशनपछि सेवा प्रवाहलाई थप प्रभावकारी बनाउन नयाँ व्यवस्था लागू गरेको छ ।

विभागको पत्रअनुसार कार्यालय परिसरमा अनधिकृत व्यक्तिहरू (बिचौलिया) को प्रवेशमा कडाइ गरिएपनि अब कार्यालयभित्र प्रवेश गर्नका लागि सेवाग्राहीले अनिवार्य रुपमा परिचय खुल्ने कागजात देखाउनुपर्ने व्यवस्था गरिएको छ । कार्यालयले जारी गरेको सूचनामा सेवाग्राहीलाई सहजीकरण गर्न आवश्यक परेमा मात्र भू–सेवा सञ्चालक, कानून व्यवसायी तथा लेखापढी व्यवसायीलाई प्रवेश अनुमति दिइने उल्लेख गरिएको छ । 

यस्ता व्यक्तिहरूले भने नेपाल लेखापढी तथा कानून व्यवसायी एसोसिएसन,इकाई समिति भद्रपुरका अध्यक्षबाट जारी गरिएको परिचयपत्र अनिवार्य रुपमा साथमा राख्नुपर्नेछ । त्यस्तै, सेवाग्राहीलाई आवश्यक कागजातसहित मात्रै कार्यालय आउन तथा आफ्नो कामबाहेक अनावश्यक भीडभाड नगर्न पनि आग्रह गरिएको छ । 

कर्मचारी बाहेक अन्य अनधिकृत व्यक्तिलाई कुनै पनि फाँटभित्र प्रवेश गर्न पूर्णरूपमा निषेध गरिएको कार्यालयले जारी गरेको सूचनामा स्पष्ट पारिएको छ । मालपोत भद्रपुरले ९ वटा पालिकालाई सेवा प्रवाह गर्दै आइरहेको छ ।